Ekki væla yfir myrkrinu - kveiktu frekar ljós!

Letihelgi að ljúka

Sun, 16 Nov 2008 22:41:06 GMT

Jæja, þá er þessari indælis letihelgi að verða lokið. Tókum því rólega heima í gær enda leiðindaveður og í dag skaust ég í nokkra tíma í vinnu í morgunn og fór svo í messu með fermingarbarninu mínu. Eftir að hafa borðað vöfflurnar sem hún bakaði handa okkur í kaffinu lagði ég mig í sófann með verkefnabunka og er búin að vera þar að mestu leyti síðan. Er fyrir vikið nokkurn veginn búin að ná í skottið á mér í vinnunni þrátt fyrir að hafa verið á námskeiði bróðurpartinn af síðustu viku.
Var annars að panta í Herjólf fyrir - ekki bara næstu helgi - heldur fyrir okkur heim eftir áramótin. Nú þegar Bakkaflugið er hætt og til stendur að koma heim þegar Vestmanneyingar eru að halda þrettándagleðina sína er betra að vera tímanlega með þetta allt saman. Stefnum að því að leggja Herjólf undir okkur föstudaginn 2. jan, með þrjá bíla, hestakerru, tvo hesta og einn hund. Býsna fyrirferðamikil fjölskylda8)
En nú er rétt að fara að koma sér í bólið.
Góða nótt - og já, það væri nú alveg gaman að sjá hverjir eru að skoða þessa síðu, alltaf fullt af heimsóknum en ekki mikið um að fólk kvitti.
Ekki það að þið þurfið að kvitta í hvert skipti - ég geri það næstum aldrei sjálf - en það væri gaman að vita hverjir þetta eru ;)
Knús 8)

Skipulag, skipulag, skipulag...

Mon, 10 Nov 2008 22:13:03 GMT

Jæja, þá lítur út fyrir að líf mitt sé að verða nokkuð skipulagt fram að jólum. Ótrúlegt en satt þá er engin ferð í fjarlæg landshorn á plani næstu vikna - svo það lítur út fyrir rólegt tímabil. Er samt að hugsa um að skreppa yfir sundið til Norðureyjar og heimsækja höfuðborgina eftir tæpar tvær vikur, þ.e.a.s. 21.-23. nóvember, svona í jólaferð. Þar er meiningin að gera fyrsta átak í jólagjafakaupum og annað átak í að hitta eitthvað af vinum og vandamönnum. Að öðru leyti verðum við mæðgur óvenju heimakærar þar sem nú styttist í frumsýningu á leikritinu hjá Maríu Ösp og það verður sýnt allar helgar í desember. Mamma kemur til okkar í heimsókn fyrstu helgina í desember og svo styttist óðfluga í jólafríið með allt sitt dásamlega letilíf.8)
Svona getur lífið nú verið einfalt á köflum ;)

Mikið er gott að kúldrast inni þegar rignir...

Tue, 04 Nov 2008 21:42:28 GMT

Sit í stofunni og nýt þess að hlusta á rigninguna berja á glugganum. María Ösp er niðri í leikhúsi á æfingu - eins og reyndar flestar lausar stundir þessar vikurnar. Hún fór á leiklistarnámskeið fyrir hálfum mánuði, fékk hlutverk í jólaleikriti leikfélagsins í framhaldi af því og hefur varla talað um annað síðan;) Ég er reyndar hæstánægð með þetta og held að þetta sé mjög góð reynsla. Ég fór niður eftir um daginn til að hitta leikstjórann af því ég sá að ég myndi missa af foreldrafundinum sem búið var að boða daginn sem ég fór í Dalina. Ég sagði frá því að ég yrði í burtu og spurði hvort það væri eitthvað sérstakt sem ég þyrfti að vita. Mér var sagt frá fyrirkomulaginu sem yrði á æfingum og svo sagði leikstjórinn að það ætti líka að athuga hvort einhverjir foreldrar væru tilbúnir til að hjálpa til við undirbúning sýninganna. Ég sagðist vera alveg tilbúin til að aðstoða ef það væri eitthvað sem ég gæti gert - og fékk svarið "Það þarf til dæmis að sauma þrettán jólasveinabúninga!!"
Við María Ösp litum hvor á aðra, fórum að skellihlæja og þegar María náði andanum leit hún á leikstjórann og sagði með miklum sannfæringarkrafti: "Þú vilt ekki láta mömmu sauma jólasveinabúninga - en hún getur örugglega hjálpað þér með sviðsmyndina" :p
Leikstjórinn varð dálítið undarleg á svipinn en þegar ég tók heilshugar undir þá brosti hún bara mjög samúðarfull á svipinn og fór eitthvað að tala um að það gætu auðvitað ekki allir gert allt :$

Annars er fátt nýtt að frétta, bara alltaf nóg að gera ... og í þeim töluðum orðum ætla ég að fara að skoða fyrstu drög að fjárhagsáætlun næsta árs fyrir skólann:s
Hafið það gott!

Fór ég norður, flýtti mér......

Mon, 03 Nov 2008 23:14:30 GMT

... eða reyndar flýtti ég mér ekkert sérstaklega. Ég átti flug upp á Bakka um miðjan dag á föstudaginn, en rétt áður en flugvélin slapp í loftið dró himnafaðirinn fyrir gluggana hjá sér - og það var ekkert meira flogið þann daginn. Ég brunaði í Herjólf, hringdi í Heiðu, sem beið þolinmóð á Bakka, hún tók þessari skipulagsbreytingu af stakri ró og steinsvaf svefni hinna réttlátu - og steinþreyttu - í bílstjórasætinu á Lúx þegar ég kom í Þorlákshöfn kl. rúmlega sjö um kvöldið. Svo brunuðum við norður - svo Stella mín, það kom ekkert að sök þó þú værir ekki heima, það var komið langt fram yfir þinn háttatíma þegar við náðum Akureyri.
Helgin var alger snilld og erfitt að segja hvort það var fegurðarsamkeppnin á Svalbarði, kaffið og kræsingarnar í skólanum eða Smalabitinn sem stóð upp úr. Það klikkar alla vega aldrei að taka þátt í skemmtunum með Þistlum og nágrönnum þeirra, hvert svo sem tilefnið er 8)
Í gær brunuðum við svo suður aftur, í þetta skiptið austan megin. Ég svaf heima á ættaróðalinu og var svo mætt eldsnemma á Bakka til að fljúga yfir og mæta í vinnuna. Veðrið var stórfínt og ég sá ekki betur en aldrei þessu vant yrði ekkert vesen með flugið. Þegar ég var að renna upp að flugstöðinni fékk ég hins vegar þær fréttir að vélin hefði verið send í sjúkraflug - svo það var ekkert annað að gera en að doka.. og doka... og doka... eins og stundum áður:cry: Á endanum mætti ég í vinnuna um hádegi - ekkert alltof ánægð með mig. Ákvað samt að kvarta ekki mikið eftir að hafa hitt skoskan kennara með nemendahóp á Bakka. Sá kemur frá einni af skosku eyjunum. Þar er ferja eina samgönguleiðin og lendingarskilyrðin eru svo slæm að ef að veður versnar, þegar ferjan er á leiðinni á milli, þá verður hún að sigla um þangað til veðrinu slotar því það er ekki hægt að lenda. Hann sagðist hafa lent í að vera að veltast í ferjunni í 17 tíma í haugasjó meðan beðið var eftir að hægt yrði að leggjast að bryggju.
Þá vil ég nú heldur bíða á Bakka brot úr degi;)
En nú er það bólið Zzzzzzz! Góða nótt 8)

Páskafríið liðið... og reyndar sumarfríið líka...

Tue, 28 Oct 2008 20:41:18 GMT

Meira að segja farið að styttast töluvert í jólafríið :$ Að minnsta kosti er jólastemningin ekki orðin svo langt undan á þessu heimili. María Ösp er nefnilega komin með annan fótinn í leikfélagið hér og tekur þátt í uppfærslu á jólaleikriti sem á að frumsýna fyrstu helgina í desember. Æfingar eru því að komast á fullt og hún kemur heim syngjandi jólalög í tíma og ótíma. Kemur sér að mér finnst jólin líka skemmtileg - jafnvel þó það sé bara október:$
Annars erum við kátar þrátt fyrir allt krepputalið og nokkuð glaðar með að hafa ekki átt neinar milljónir til að tapa. Stefnir í stutta ferð í Þistilfjörðinn um næstu helgi en svo ætlum við að fara að reyna að vera heima hjá okkur nokkrar helgar til tilbreytingar;)
Heimilismeðlimum Sóleyjargötunnar fjölgaði umtalsvert í haust þegar Adda vinkona okkar - og tíkin hennar, hún Kleó - fluttu til okkar og innrituðust í Framhaldsskólann (þ.e.a.s. Adda, ekki Kleó). Nú er því hægt að spila Manna á kvöldin og í augnablikinu stend ég uppi sem ótvíræður sigurvegari8) svo þetta er fullkomið líf. Vorum líka að fá staðfestingu á að við erum búnar að fá húspláss fyrir tvo hesta í vetur svo nú stefnir allt í að Köttur minn (sem er hestur, þrátt fyrir að nafnið sé kannski örlítið misvísandi) komi til Eyja á næstunni. Hlakka ótrúlega til, enda hefur hann varla verið snertur eftir að hann var taminn - en nú verður gerð bragarbót á því.
En... nú verð ég að fara að gera eitthvað af viti;)
Aldrei að vita nema ég bloggi aftur fyrir jól.
Knús til ykkar sem enn kíkið hér inn:p

Páskafrí í vændum!

Mon, 10 Mar 2008 17:50:41 GMT

Jæja, þá fer að styttast verulega í páskafrí og þar með í að við mæðgur skellum okkur yfir sundið og drífum okkur í höfuðborgina :d
María Ösp á flug í hádeginu á föstudaginn og ég ætla að fara með seinni ferð á laugardag. Stefnan er svo að vera í borginni og taka góðan skurk í að heimsækja vini og vandamenn fram á miðvikudag, en þá förum við Kristjana norður í Þistil-fagra-fjörðinn - með viðkomu og kaffisopa hjá Stellu í Berghólnum.
Er reyndar aðeins á skjön við systur mínar þessa dagana því Stella ætlar einmitt að koma suður og vera í sveitasælunni um páskana - á meðan ég er fyrir norðan :s En það verður ekki við öllu séð.
En nú er ég á leiðinni á bekkjarkvöld hjá Maríu Ösp svo það er ekki til setunnar boðið 8)

Það er snjór úti - eins gott að njóta þess meðan á því stendur!!!

Mon, 03 Mar 2008 17:13:27 GMT

Já, því á morgun spáir vitanlega bullandi rigningu og þar með er gamanið búið :s
En í gær fengum við sem sagt bara næstum því alvöru byl og það er allt á kafi í snjó. Fullkomið að liggja í híði sínu á sunnudegi og spila og hafa það skemmtilegt 8) Veðrið var nú reyndar ekki verra en það að við María Ösp skokkuðum (eða öllu heldur skreiddumst yfir skaflana) niður í skóla seinni partinn - bara svona til að sjá hvort það væri ekki allt í lagi. Við löbbuðum svo bara í skólann í morgunn, þar sem skaflinn sem liggur eftir endilangri götunni minni náði mér í öxl, en það var komið frábært veður svo það var bara gaman. Í skólann mætti svo slangur af krökkum og smá fjölgaði þegar leið á daginn - eftir því sem fleiri Vestmannaeyingar grófu sig út úr húsum sínum og röltu af stað í sólinni. Mikil stemning hjá yngri hópnum í snjóhúsagerðinni - enda ekki oft sem svona tækifæri gefast til þess hér 8)
Mér varð hins vegar hugsað til stóra snjóhússins sem varð til á Svalbarði þegar búið var að draga bílinn minn innan úr stórum skafli þar um árið. Hefði svo sem ekki verið í frásögur færandi nema af því að kvöldið áður ætlaði ég af bæ, setti skófluna í skottið af því veðrið var snarvitlaust - og gleymdi svo að taka hana með inn. Hún kom því að litlu gagni um morguninn :$
En nú er rétt að drífa sig út í snjóinn og njóta hans meðan hann er á staðnum. Skandall á svona fallegum degi að sitja inni við tölvuna. Hafið það gott - það ætla ég að gera 8)

Persónuleg þjónusta úti á landi

Tue, 12 Feb 2008 17:47:46 GMT

Ef það er ekki snilld að vera viðskiptavinur verslunarinnar á Þórshöfn þá veit ég ekki hvað :D

Lenti reyndar í smá vandræðum með að finna hana í símaskránni, því hún hefur jú breytt um nafn síðan ég flutti af svæðinu - en þarna vinna enn sömu snillingarnir.

Haldið þið til dæmis að eftirfarandi samtal hefði getað átt sér stað í höfuðborginni?

- Sæl Dúa, þetta er Fanney hérna.

- Já blessuð, hvað get ég gert fyrir þig.

- Ég er í smá vandræðum, hann Reynir í Flögu á stórafmæli í dag. Hann er í vinnunni uppi í Vegagerð og okkur systurnar langar svo að senda honum whiskyflösku í tilefni dagsins. Ég veit að vísu að Vínbúðin opnar ekki strax, og þið eruð ekki vön að sendast með vörur og.....8|

- Þetta er ekkert mál. Ég geng bara frá þessu í vínbúðinni, tek kort hérna í búðinni og sendi hann Jón minn með þetta til karlsins núna í hádeginu. Þú getur svo bara haft samband aftur í dag og lagt inn á mig fyrir þessu 8)

Finnst ykkur svo skrýtið þó ég legðist í tímabundið þunglyndi um daginn yfir að komast ekki norður að kíkja á liðið?

En - þetta þýðir ekki, þarf að fara að lesa mér til um Öryggis- og áhættumat á vinnustöðum - er búin að lofa upp í báðar ermarnar á mér að mæta á námskeið í slíkri matsgerð á morgunn með húsverðinum og smíðakennaranum (sem einn og sér væri efni í marga pistla;) og fara að teikna upp eitt stykki nýtt mat fyrir skólahúsin okkar:$

Meira seinna ;)

Það er rok, rok, ég ræ ekki...............

Mon, 11 Feb 2008 22:20:54 GMT

Suðvestan rok, sunnan rok, suðaustan rok, austan rok, vestan rok og jafnvel norðan rok :$

Held svei mér þá að við séum búin að prófa allar tegundirnar á markaðnum síðustu viku eða svo. Föstudagurinn var samt áberandi öflugastur. Ég lagði bílnum mínum í hallann fyrir utan skólann í snjóskafli í góðri trú um morguninn og varð nánast að skríða meðfram honum og halda mér í af öllum kröftum til að komast upp í hann aftur seinni partinn. Um kvöldið var ég svo á leiðinni í afmæli í þarnæstu götu, fór í gönguskónum og með hina í hendinni - til að komast út í bíl í heilu lagi - smellti mér yfir til afmælisbarnsins og fylgdist svo - í hláturskasti - með gestunum koma. Þeir komu labbandi mislanga leið, eftir því hvað þeir komust á bílunum langt upp svellbunkann í götunni. Þarna sáust allar tegundir af því að vera með "blásið hár" og meira að segja pakkarnir voru rifnir og tættir. Rafmagnið fór meira að segja svona til að fullkomna stemninguna. Sem sagt bráðskemmtilegt kvöld í alla staði

Að öðru leyti var helgin róleg. Við María Ösp fórum með fullt af dóti í Rauða krossinn og græddum þar með fullt af plássi í geymslunni og fataskápnum mínum. Á sunnudaginn fór hún svo á frjálsíþróttaæfingu og tókst að togna í lærinu svo nú haltrar hún um og reynir að halda sig sem mest á jarðhæðinni.

Um næstu helgi er svo stefnan tekin í Skaftártunguna þar sem Heiða systir situr sveitt þessa dagana í þorrablótsundirbúningi. Þar stefnir því allt í skemmtilega daga með fjölskyldu og vinum og með smá heppni gæti farið svo að Herjólfur sigldi samkvæmt áætlun báða dagana - aldrei þessu vant 8)

Svo fer alveg að koma að því að við tökum eina helgi í höfuðborginni og rukkum inn eitthvað af kaffibollunum sem við eigum útistandandi þar 8)

Þangað til - hafið það gott og passið að fjúka ekki ;)

Ég er rangur maður, á röngum tíma, í vitlausu húsi........

Sat, 02 Feb 2008 22:49:33 GMT

Jæja, kannski ekkert sérstaklega á röngum tíma - en alveg örugglega í vitlausu húsi.8| Akkúrat núna er nefnilega þorrablót á Þórshöfn og þar eru allir Þistlar sem vettlingi geta valdið. Ef ég bara væri þar þá ætti ég eftir að dansa og syngja í marga klukkutíma - fara svo heim í Gunnarsstaði undir morgunn, fá meira hangikjöt (og mjólk með Skúla) og syngja enn þá meira, fara svo heim í Svalbarð að sofa í birtingu og leggja svo af stað suður aftur þegar mér tækist að opna augun.

Þetta var sem sagt plan helgarinnar - áður en á hana var skellt námskeiði sem ég gat ekki látið fram hjá mér fara.:cry: Hér halda menn reyndar að það sé ekki í lagi með mig þegar ég minnist á að ætla að sigla og keyra í 12-13 tíma hvora leið til að eiga einn og hálfan sólarhring með Þistlum - en það er svo sannarlega þess virði á svona stundum. Svo ég er að hugsa um að halda áfram að vorkenna sjálfri mér svona fram undir kl. átta í fyrramálið, þangað til ég er viss um að allt fjörið sé búið:S

Annars er allt gott að frétta. María Ösp kíkti til pabba síns um helgina og ég tók með mér verkefnahrúgu heim úr vinnunni og er búin að sitja við tölvuna síðan ég kom heim af námskeiðinu, tjúna músíkina upp úr öllu valdi og óska mér norður. En á morgunn verður heimþráin væntanlega runnin af mér og þá er aldrei að vita nema ég setji eitthvað hér inn sem verður aðeins minna sjálfhverft.

Kveðjur úr snjónum og frostinu á Suðurhafseyjunni minni 8)

Ótrúlegt!!!

Thu, 12 Apr 2007 10:49:22 GMT

Hér skrifa ég ekki einu sinni eina færslu í mánuði - og samt er hópur af fólki sem virðist kíkja hérna inn reglulega. Ef þetta er ekki þolinmæði þá veit ég ekki hvað ;)

Ætla nú svo sem ekkert að lofa að standa mig betur í framtíðinni - en hver veit. Er komin til Akureyrar á ráðstefnu hjá Skólaþróunarsviðinu og á morgun er vörnin fyrir mastersritgerðina mína8|

Sennilega koma fréttir hér inn um helgina af því hvernig gekk - þ.e.a.s. ef það hefur gengið þokkalega vel - annars verð ég líklega ekki til viðtals um þetta allt saman á næstunni:$

En eins og er sit ég í tölvustofunni á Sólborg og rifja upp gamlar minningar. Ýmislegt búið að ganga á frá því ég sat hérna í fyrravetur og velti fyrir mér hvort ég ætti að sækja um í Vestmannaeyjum! En svona er lífið, breytist hratt og kemur manni stöðugt á óvart. Margt áhugavert í farvatninu þessa dagana og nóg að gera í vinnunni líka, Danmerkurferð í sigtinu í vor, útskrift og svo er ég farin að hlakka til að flytja í nýja húsið mitt í byrjun júlí ;)

En nú er rétt að fara og krækja í kaffibolla og halda svo áfram að vinna...

Knús til ykkar sem enn nennið að kíkja hingað inn.

Fanney

Hótel Jörð

Sun, 25 Feb 2007 19:58:11 GMT

Langt síðan ég skrifaði síðast og mikið vatn runnið til sjávar á þeim tíma. Er heima hjá mér aldrei þessu vant á sunnudagskvöldi og það er ákaflega notalegt en líka tregablandið. Flestar helgar síðan í byrjun nóvember, síðan að pabbi veiktist fyrir alvöru, höfum við María nefnilega hoppað um borð í Herjólf á föstudögum, siglt í land og brunað svo austur í sveit. Fyrstu helgunum eyddi ég á elliheimilinu við rúmstokkinn hjá pabba en svo eftir að við gátum tekið hann heim á ættaróðalið vorum við mæðgur flestar lausar stundir þar. Það hefur stundum tekið á að sjá hann, þennan stólpa í tilverunni í gegnum árin, svona veikan og hjálparþurfi en nú gleðst ég yfir hverri stund sem við náðum saman á þessum tímabili. Við vissum ekki í nóvember að tíminn sem við áttum eftir yrði svona knappur en þannig varð það nú samt. Fyrir hálfum mánuði sat ég hjá honum á spítala í Reykjavík. Þar kvöddumst við í síðasta sinn og hann stakk af yfir móðuna miklu laus við veikindin sem voru búin að sjúga úr honum allan þrótt.

Við tók vika af útfararundirbúningi o.þ.h. og um síðustu helgi bárum við stelpurnar hans pabba hann síðasta spölinn. Á sunnudagskvöld komum við María Ösp svo heim til Eyja í austanátt og haugasjó, sjóveikar og lúnar.

Síðan þá hefur verið nóg að snúast og því er hvíldin þessa helgina vel þegin. Samt get ég ekki neitað því að einhvers staðar innra með mér grætur lítil stelpa yfir að fá aldrei að hitta pabba sinn oftar.:cry:

Nýtt ár??? - já, það er líklega rétt...

Sat, 03 Feb 2007 12:58:15 GMT

Ég gerði reyndar heiðarlega tilraun til að blogga strax að afstöðnum jólum og áramótum en síðan var í einhverju mótþróakasti og þegar langi pistillinn minn gufaði upp og hvarf fór ég í fýlu og steinhætti að hugsa um blogg næstu vikurnar.

Það er reyndar líka búið að vera töluvert þétt að gera á þessu nýbyrjaða ári - þó það sé svo sem engin afsökun :S En akkúrat núna er prentarinn að hamast við að framleiða nýtt eintak af ritgerðinni minni því þessi helgi er helgin þar sem loka-loka- lokaútgáfan af mastersverkefninu á að líta dagsins ljós8)

Að því loknu held ég að ég fari að eiga eftir tíma í sólarhringnum eins og annað fólk til að rifja upp hvað maður gerir í tómstundum - og jafnvel hringja í vini mína af og til;)

Annars er það helst að frétta á nýju ári að um síðustu helgi fórum við Heiða og Kristjana heim í Þistil-fagra-fjörðinn á þorrablót. Eins og Þistla er von og vísa stóð veislan óslitið í tólf tíma og innihélt - auk blótsins sjálfs, sem var afar vel heppnað - konunglegar veitingar, söng, gleði og góðan félagsskap.

Um svona helgi er eins og gefur að skilja lítill tími eftir til að bruðla með í svefn og því var undirrituð frekar sybbin á leiðinni heim í Herjólfi. Það var frekar vont í sjóinn og ekki mikill svefnfriður - en þegar skipið var komið í var við Eyjar og skipstjórinn tilkynnti að við yrðum lögst við bryggju eftir 10 mínútur datt allt í dúnalogn bæði úti og í kojunni hjá ferðalangnum. Næsta sem ég vissi var að lestin opnaðist með tilheyrandi ískri til að hleypa bílunum frá borði. Ég held að ég hafi aldrei á ævinni verið fljótari í fötin:S

Þegar ég kom niður voru síðustu bílarnir að smeygja sér fram hjá Forresternum mínum sem stóð nánast í dyrunum einn og yfirgefinn. Þetta atvik vakti ómældan fögnuð hjá áhafnarmeðlimum skipsins í lestinni sem buðu allir sem einn góðan dag af miklum innileika. :evil: Ég hins vegar brunaði skömmustuleg upp úr skipinu og þakkaði mínu sæla fyrir að hafa ekki vaknað í Þorlákshöfn í næstu ferð 8|

En - prentarinn er þagnaður - svo nú er að halda áfram. Lofa annarri færslu í þessum mánuði!!!

Letilegur laugardagur og líflegur sunnudagur

Mon, 30 Oct 2006 15:43:28 GMT

Helgin byrjaði stórvel. Fór í kennarapartý og söng þar fram eftir nóttu, kom svo heim, skreið í bólið og kúrði fram eftir daginn eftir - enda María Ösp í góðu yfirlæti heima hjá vinkonu sinni. Allan laugardaginn slæptumst við svo af hjartans lyst, ég fór í langan labbitúr, María Ösp var meira og minna úti og svo tókum við letilegt sjónvarpskvöld. Á sunnudagsmorgun var hins vegar friðurinn úti. Við mæðgur vorum að hamast í heimilisstörfunum, ég að taka úr uppþvottavélinni og ganga frá þvotti og María að hreinsa hamstrabúrið. Á meðan skoppaði hamsturinn sæll og glaður um gólfið frammi í kúlunni sinni. Þangað til allt í einu að ég uppgötvaði að kúlan lá í tvennu lagi undir eldhúsborðinu - og hamsturinn var hvergi sjáanlegur........8|

Upp úr þessu spannst allsherjar harmleikur. Við María Ösp skriðum um öll gólf með tárin í augunum (hún af sorg yfir væntanlegum örlögum hamstursins, ég af öllu rykinu undir húsgögnunum;) ) hamsturinn sást hvergi og kötturinn lá grenjandi á gluggunum til skiptis og skildi ekkert í þessari mannvonsku að við skyldum ekki hleypa honum inn eins og venjulega. Hluta nætur eyddi ég svo í að læðast eins og indíáni um húsið og hlusta eftir merkjum um að einhvers staðar væri litla kvikindið á ferðinni. Hann hefur hins vegar líklega hlegið dátt einhvers staðar inni í stofuhúsgögnunum og ég er engu nær um hvar hann heldur sig.

Kötturinn fékk að koma inn í stigann bakdyramegin og ég hélt í bjartsýni minni að hann myndi sætta sig við að vera þar í nótt. Hann hins vegar fékk eitt af sínum víðfrægu kvíðaröskunarköstum yfir tiltækinu, urlaðist veinandi í nokkra hringi í herberginu og þeyttist svo út aftur og hefur ekki sést síðan...... Já, samfélag við gæludýr er augljóslega mannbætandi og gott til að róa heimilislífið:evil:

Núna er svo komið að dóttir mín tilkynnti mér með tárin í augunum að hún færi sko ekki upp á land í vetrarfrí á fimmtudaginn ef hamsturinn væri ekki fundinn - lítur út fyrir að ef allt annað þrýtur verði ég að hleypa kettinum inn!!!

Annars allt gott að frétta frá Eyjum;)

Mér finnst rigningin góð...

Fri, 27 Oct 2006 16:46:17 GMT

Ákvað að henda inn nokkrum línum í tilefni þess að það er að koma helgi - önnur helgin í röð sem mér tekst að vera heima hjá mér í góðu yfirlæti á þessu hausti :lol:
við erum að ljúka vinaviku í skólanum, hér hafa verið hattadagar, furðufatadagar og í dag er rauður dagur, svo ég sit hér í rauðri lopapeysu og hlusta á Barnaskólahúsið fyllast af nýjum börnum í upphafi helgar. Hér eru nefnilega að koma í hús hópur af íþróttastelpum á leið á mót. Þær eru reyndar í misgóðu ásigkomulagi, eftir langa og stranga ferð með Herjólfi í hífandi roki og rigningu. Get ekki ímyndað mér að það hafi verið skemmtileg ferð. Í dag ætluðum við að ljúka vinavikunni með því að mynda vinalega keðju úr nemendum og starfsfólki skólans og tengja þannig saman starfsstöðvarnar. Veðrið var hins vegar sérdeilis óvingjarnlegt og keðjumynduninni því skotið á frest.
Ég er hins vegar á leið í partý í kvöld með Hamarsskólahópnum og hlakka verulega til. Næsta vika er svo stutt og laggóð, kennsla mánudag og þriðjudag, starfsdagur á miðvikudag og svo vetrarfrí. Við mæðgur ætlum upp á land á fimmtudag, María Ösp ætlar til pabba síns og ég ætla austur á búgarðinn og vera dugleg að kíkja á pabba minn þessa daga ;)
Vissuð þið annars að það eru ekki nema sjö vikur eftir af skólanum fyrir jól???
Ótrúlegt ekki satt.

Óveðurskveðjur.....